JEE Main 2027: ஜே.இ.இ மெயின் தேர்வு தேதி அறிவிப்பு; பாட வாரியான சிலபஸ், தேர்வு முறை இதுதான்

ஜே.இ.இ முதன்மைத் தேர்வுக்கான கால அட்டவணை வெளியீடு; தேர்வுக்கான தகுதிகள், பாட வாரியான சிலபஸ், தேர்வு முறை உள்ளிட்ட முழு விபரம் இங்கே

தேசியத் தேர்வு முகமை (NTA), டிசம்பர் 2026-ல் தொடங்கவுள்ள தேசிய அளவிலான நுழைவுத் தேர்வுகளுக்கான கால அட்டவணையை வெளியிட்டுள்ளது. அறிவிக்கப்பட்ட அட்டவணையின்படி, கூட்டு நுழைவுத் தேர்வு (JEE) மெயின் 2027 தேர்வானது ஜனவரி 22 முதல் 24 வரையிலும், ஜனவரி 28 முதல் 30 வரையிலும் நடைபெறவுள்ளது; ஜனவரி 31-ஆம் தேதி மாற்றுத் தேதியாக (buffer date) ஒதுக்கப்பட்டுள்ளது.

கல்வி அமைச்சகத்தின் (MoE) சார்பில் தேசிய தேர்வு முகமையால் நடத்தப்படும் ஜே.இ.இ மெயின் தேர்வு, தேசிய அளவிலான பொறியியல் நுழைவுத் தேர்வாகும். மருத்துவப் படிப்பு சாராத அறிவியல் பிரிவு மாணவர்களுக்கு, இந்தியாவின் முன்னணி தேசிய தொழில்நுட்பக் கழகங்கள் (NITs), இந்தியத் தகவல் தொழில்நுட்பக் கழகங்கள் (IIITs), அரசு நிதியுதவி பெறும் தொழில்நுட்பக் கல்வி நிறுவனங்கள் (GFTIs) மற்றும் பிற பொறியியல் கல்லூரிகளில் இளங்கலை படிப்புகளில் சேருவதற்கு இத்தேர்வு வழிவகுக்கிறது.

இந்தியத் தொழில்நுட்பக் கழகங்கள் (IITs) போன்ற இந்தியாவின் உயர்தர பொறியியல் கல்வி நிறுவனங்களில் சேர விரும்பும் விண்ணப்பதாரர்கள் தேர்ச்சி பெற வேண்டிய 'ஜே.இ.இ அட்வான்ஸ்டு' (JEE Advanced) தேர்விற்கு, 'ஜே.இ.இ மெயின்' தேர்வில் தேர்ச்சி பெறுவது ஒரு முன்நிபந்தனையாகவும் அமைகிறது.

முந்தைய தேர்வுச் சுழற்சிக்காக தேசிய தேர்வு முகமை வெளியிட்ட புள்ளிவிவரங்களின்படி, முதல் கட்டத் தேர்வுக்கு (Session 1) மொத்தம் 13,55,293 விண்ணப்பதாரர்கள் பதிவு செய்திருந்தனர். இவர்களில் 13,04,653 விண்ணப்பதாரர்கள் தேர்வில் பங்கேற்றனர்.

தேர்வுக்கான தற்காலிக அட்டவணை ஏற்கனவே அறிவிக்கப்பட்டுள்ள நிலையில், ஜே.இ.இ மெயின் 2027 தேர்வின் முதல் அமர்வுக்கான (Session 1) விரிவான அறிவிப்பை என்.டி.ஏ அமைப்பு அடுத்த மாதம் வெளியிடும் என்று எதிர்பார்க்கலாம். கடந்த தேர்வுச் சுழற்சியில், இதற்கான அறிவிப்பு அக்டோபர் 31 அன்று வெளியிடப்பட்டது.

தேர்வுக்குத் தயாராகும் விண்ணப்பதாரர்கள், கடந்த ஆண்டின் அடிப்படையில் தகுதி வரம்புகள், தேர்வு முறை மற்றும் பாடத்திட்டம் ஆகிய விவரங்களை கீழே காணலாம்:

தகுதி வரம்புகள்

— ஜே.இ.இ மெயின் தேர்வை எழுதுவதற்கு வயது வரம்பு எதுவும் நிர்ணயிக்கப்படவில்லை. இருப்பினும், விண்ணப்பதாரர்கள் தாங்கள் சேர விரும்பும் கல்வி நிறுவனத்தின் வயது வரம்பு நிபந்தனைகளைப் பூர்த்தி செய்ய வேண்டும்.

— 2025 அல்லது 2026-ஆம் ஆண்டுகளில் 12-ஆம் வகுப்பு அல்லது அதற்கு இணையான தேர்வில் தேர்ச்சி பெற்றவர்கள் அல்லது 2027-இல் அத்தேர்வை எழுதவுள்ளவர்கள், வயது வரம்பு ஏதுமின்றி ஜே.இ.இ மெயின் தேர்வை எழுதத் தகுதியுடையவர்கள் ஆவர்.

— 2024 அல்லது அதற்கு முந்தைய ஆண்டுகளில் 12-ஆம் வகுப்பில் தேர்ச்சி பெற்றவர்கள் இதற்குத் தகுதியற்றவர்கள்.

— மாநிலக் குறியீடு (State code) என்பது விண்ணப்பதாரரின் நிரந்தர அல்லது தற்காலிக வசிப்பிடத்தின் அடிப்படையில் அல்லாமல், அவர்கள் 12-ஆம் வகுப்பில் தேர்ச்சி பெற்ற இடத்தின் அடிப்படையில் அமையும்.

— தேசிய திறந்தநிலை பள்ளியில் (NIOS) பயின்ற விண்ணப்பதாரர்களுக்கு, அவர்களின் கல்வி மையம் அமைந்துள்ள இடத்தின் அடிப்படையில் மாநிலக் குறியீடு தீர்மானிக்கப்படும்.

— வெளிநாடுகளில் 12-ஆம் வகுப்பில் தேர்ச்சி பெறும் இந்திய வம்சாவளி வெளிநாட்டுக் குடிமக்கள் (OCI), என்.ஐ.டி-கள், ஐ.ஐ.ஐ.டி-கள் மற்றும் பிற சி.எஃப்.டி.ஐ-களில் 'அகில இந்திய ஒதுக்கீட்டின்' (All India quota) கீழ் விண்ணப்பிக்கலாம்; ஆனால் 'சொந்த மாநில ஒதுக்கீட்டின்' (Home state quota) கீழ் விண்ணப்பிக்க முடியாது.

மேற்கூறிய தகுதி நிபந்தனைகள் முந்தைய ஆண்டு தேர்வுச் சுழற்சியின் அடிப்படையில் அமைந்தவை என்பதை நினைவில் கொள்ள வேண்டும். தேர்வுக்கு விண்ணப்பிக்கும் முன், ஜே.இ.இ மெயின் 2027 அறிவிப்பு வெளியானதும், அதில் குறிப்பிடப்பட்டுள்ள தகுதி நிபந்தனைகளில் ஏதேனும் மாற்றங்கள் உள்ளனவா என்பதை விண்ணப்பதாரர்கள் சரிபார்க்க வேண்டும்.

ஜே.இ.இ மெயின் 2027 - முதல் அமர்வு (Session I) தேர்வு முறை

ஜே.இ.இ மெயின் தேர்வானது முக்கியமாக கணிதம், இயற்பியல் மற்றும் வேதியியல் ஆகிய மூன்று பாடங்களைக் கொண்டுள்ளது. விரிவான தேர்வு முறையைத் தெரிந்துகொள்ள விண்ணப்பதாரர்கள் பின்வரும் அட்டவணையைப் பார்க்கலாம்.

தேர்வை நடத்தும் அமைப்பு - தேசியத் தேர்வுகள் முகமை (NTA)

தேர்வு முறை - கணினி வழித் தேர்வு (CBT)

தேர்வின் மொத்த கால அளவு - 180 நிமிடங்கள் (3 மணிநேரம்)

மொத்தக் கேள்விகளின் எண்ணிக்கை - 75 கேள்விகள்

மொத்தப் பிரிவுகள் - 3

மொத்த மதிப்பெண்கள் - 300

கேள்வி வகை – கொள்குறி வகை வினாக்கள் (MCQs)

இயற்பியல் பிரிவில் உள்ள கேள்விகள் - 25

வேதியியல் பிரிவில் உள்ள கேள்விகள் - 25

கணிதப் பிரிவில் உள்ள கேள்விகள் - 25

ஒரு கேள்விக்கான மதிப்பெண் - 4 மதிப்பெண்கள்

சரியான பதில்களுக்கு வழங்கப்படும் மதிப்பெண் - +4 மதிப்பெண்கள்

எதிர்மறை மதிப்பெண் (Negative Marking) - –1 மதிப்பெண்

ஜே.இ.இ மெயின் 2027 தேர்வுக்கான பாடவாரியான பாடத்திட்டம்

தேசிய தேர்வு முகமையின் அதிகாரப்பூர்வ இணையதளத்தின்படி, ஜே.இ.இ மெயின் தேர்வுக்கான பாடவாரியான பாடத்திட்டம் பின்வருமாறு:

— கணிதத்திற்கான தலைப்புகள்

கணங்கள், உறவுகள் மற்றும் சார்புகள்

சிக்கலெண்கள் மற்றும் இருபடிச் சமன்பாடுகள்

அணிகள் மற்றும் அணிக்கோவைகள்

வரிசைமாற்றங்கள் மற்றும் சேர்மானங்கள்

ஈருறுப்புத் தேற்றம் மற்றும் அதன் எளிய பயன்பாடுகள்

தொடர் வரிசைகள் மற்றும் தொடர்கள்

எல்லை, தொடர்ச்சி மற்றும் வகையிடல்

தொகையீட்டு நுண்கணிதம்

வகைக்கெழுச் சமன்பாடுகள்

ஆயத்தொலைவு வடிவியல்

முப்பரிமாண வடிவியல்

வெக்டர் இயற்கணிதம்

புள்ளியியல் மற்றும் நிகழ்தகவு

முக்கோணவியல்

— இயற்பியலுக்கான தலைப்புகள்

அலகுகள் மற்றும் அளவீடுகள்

இயக்கவியல் (Kinematics)

இயக்க விதிகள்

வேலை, ஆற்றல் மற்றும் திறன்

சுழற்சி இயக்கம்

ஈர்ப்பு விசை

திண்மங்கள் மற்றும் திரவங்களின் பண்புகள்

வெப்ப இயக்கவியல்

வாயுக்களின் இயக்கக் கொள்கை

அலைவுகள் மற்றும் அலைகள்

நிலை மின்னியல்

மின்னோட்டவியல்

மின்னோட்டத்தின் காந்த விளைவுகள் மற்றும் காந்தவியல்

மின்ன காந்தத் தூண்டல் மற்றும் மாறுதிசை மின்னோட்டம்

மின்ன காந்த அலைகள்

ஒளியியல்

பொருள் மற்றும் கதிர்வீச்சின் இருமைப் பண்பு

அணுக்கள் மற்றும் உட்கருக்கள்

மின்னணுவியல் சாதனங்கள்

சோதனைத் திறன்கள்

— வேதியியல் பாடப்பகுதிகள்

வேதியியலின் சில அடிப்படை கருத்துகள்

அணு அமைப்பு

வேதிப் பிணைப்பு மற்றும் மூலக்கூறு அமைப்பு

வேதி வெப்ப இயக்கவியல்

கரைசல்கள்

சமநிலை

ஆக்சிஜனேற்ற- ஒடுக்க வினைகள் மற்றும் மின்வேதியியல்

வேதி வினைவேகவியல்

தனிமங்களின் வகைப்பாடு மற்றும் பண்புகளின் ஆவர்த்தனத் தன்மை

p-தொகுதி தனிமங்கள்

d- மற்றும் f-தொகுதி தனிமங்கள்

அணைவுச் சேர்மங்கள்

கரிமச் சேர்மங்களின் தூய்மையாக்கல் மற்றும் பண்பறிதல்

கரிம வேதியியலின் சில அடிப்படைக் கொள்கைகள்

ஹைட்ரோகார்பன்கள்

ஹாலஜன்களைக் கொண்ட கரிமச் சேர்மங்கள்

ஆக்சிஜனைக் கொண்ட கரிமச் சேர்மங்கள்

நைட்ரஜனைக் கொண்ட கரிமச் சேர்மங்கள்

உயிரியல் மூலக்கூறுகள்

செயல்முறை வேதியியல் தொடர்பான கொள்கைகள்

தேர்வுக்கான விரிவான பாடத்திட்டத்தைப் பெற விண்ணப்பதாரர்கள் தேர்வின் அதிகாரப்பூர்வ இணையதளத்தைப் பார்வையிடலாம். மேலே குறிப்பிடப்பட்டுள்ள தேர்வு முறை, தேவைகள் மற்றும் பாடத்திட்டம் ஆகியவை கடந்த ஆண்டு தேர்வு அறிவிப்பின் அடிப்படையில் அமைந்தவை. கடந்த ஆண்டுகளைப் பார்க்கும்போது, தேசிய தேர்வு முகமை பெரிய மாற்றங்களைச் செய்ய வாய்ப்பில்லை. இருப்பினும், ஜே.இ.இ 2027 குறித்த விவரங்கள் இணையத்தில் வெளியிடப்பட்டதும், அதில் ஏதேனும் மாற்றங்கள் உள்ளனவா என்பதை விண்ணப்பதாரர்கள் முழுமையாகச் சரிபார்க்க வேண்டும்.

Share: