மாணவர்கள் போராட்டத்தின் எதிரொலியாக, பொறியியல் கல்லூரி மாணவர்களுக்கு மீண்டும் அரியர் முறையை நடைமுறைக்குக் கொண்டுவர அண்ணா பல்கலைக்கழகம் திட்டமிட்டுள்ளது.
பல்கலைக்கழகத்தில் அண்மையில் நடைபெற்ற கல்விக்குழுவில் இந்த முடிவு எடுக்கப்பட்டுள்ளது. ஆட்சிக் குழு ஒப்புதல் கிடைத்தவுடன், இந்தப் புதிய நடைமுறை அமலுக்கு வரும் என பல்கலைக்கழகத் துணைவேந்தர் எம்.கே.சூரப்பா கூறினார்.
அப்போது, மாணவர்களிடம் பேச்சுவார்த்தை நடத்திய பல்கலைக்கழகப் பதிவாளர் குமார் தலைமையிலான பேராசிரியர்கள், மாணவர்கள் கோரிக்கை தொடர்பாக குழு ஒன்று அமைக்கப்பட்டு ஆலோசனைகள் நடத்தப்பட்டு, அதனடிப்படையில் நடவடிக்கை எடுக்கப்படும் என்றனர். அதனைத் தொடர்ந்து மாணவர்கள் போராட்டத்தைக் கைவிட்டு கலைந்து சென்றனர்.
நீதிமன்றத்தில் வழக்கு: இந்த நிலையில், அண்ணா பல்கலைக்கழகத்தின் 2017 கல்வித் திட்ட நடைமுறைக்கு எதிர்ப்பு தெரிவித்து சென்னை உயர் நீதிமன்றத்தில் வழக்குத் தொடரப்பட்டது. இந்த வழக்கை விசாரித்த நீதிமன்றம், அண்ணா பல்கலைக்கழகத்துக்கு நோட்டீஸ் பிறப்பிக்க உத்தரவிட்டு வழக்கு மீதான விசாரணையை பிப்ரவரி 8-ஆம் தேதிக்கு ஒத்திவைத்தது.
பல்கலைக்கழக மானியக் குழுவின் (யுஜிசி) அறிவுறுத்தல்களின் அடிப்படையிலேயே, பொறியியல் கல்வியை மேம்படுத்தவேண்டும் என்பதற்காக இந்த மாற்றங்கள் கொண்டுவரப்பட்டன. எனவே, மாணவர்களின் நியாயமான கோரிக்கைகளை மட்டுமே ஏற்றுக்கொள்ள முடியுமே தவிர, தேர்வு முறையிலே அல்லது கல்வித் திட்டத்திலோ எந்தவித மாற்றமும் செய்யப்படாது என பல்கலைக்கழக துணைவேந்தர் சூரப்பா திட்டவட்டமாக அறிவித்தார்.
மீண்டும் அரியர் முறை: இந்த நிலையில், பல்கலைக்கழக கல்விக் குழு கூட்டம் அண்மையில் நடைபெற்றது. இதில், பொறியியல் கல்லூரி மாணவர்களுக்கு மீண்டும் அரியர் நடைமுறையை அறிமுகம் செய்ய முடிவு செய்யப்பட்டுள்ளது.
மாணவர்களின் கோரிக்கையை ஏற்று, அவர்கள் முதல் பருவத் தேர்விலிருந்து வைக்கும் அரியர் தாளை எந்த பருவத் தேர்விலும் சேர்த்து எழுதிக்கொள்ள அனுமதிப்பது என கல்விக் குழுவில் முடிவு செய்யப்பட்டுள்ளது. இருந்தபோதும், பொறியியல் கல்வித் தரத்திலோ, பிற நடைமுறைகளிலே எந்த மாற்றம் செய்யப்படாது.
பல்கலைக்கழகத்தில் பிப்ரவரி 6-ஆம் தேதி நடைபெறும் ஆட்சிக் குழு கூட்டத்தில் இந்த முடிவுக்கு ஒப்புதல் பெறப்பட்ட உடன், இந்த புதிய நடைமுறை அதிகாரப்பூர்வமாக அறிவிக்கப்படும் என்றார்.