தமிழக ஆசிரியர்கள் ஜூலை மாதம் நடைபெறவுள்ள தகுதித் தேர்வில் தேர்ச்சி பெற ஏதுவாக, கல்வித் தொலைக்காட்சி வழியாகச் சிறப்புப் பயிற்சி மற்றும் வினா வங்கிகளை வழங்கப் பள்ளிக் கல்வித்துறை திட்டமிட்டுள்ளது.
தமிழகத்தில் அரசுப் பள்ளிகளில் பணியாற்றி வரும் தகுதிகாண் பருவ ஆசிரியர்களுக்கான ஆசிரியர் தகுதித் தேர்வு வரும் ஜூலை மாதம் நடைபெறவுள்ளது. இந்தத் தேர்வில் ஆசிரியர்கள் எளிதில் தேர்ச்சி பெறுவதை உறுதி செய்யும் வகையில், பள்ளிக் கல்வித்துறை ஒரு முக்கிய முயற்சியை எடுத்துள்ளது. அதன்படி, ஆசிரியர்களுக்கான சிறப்புப் பயிற்சிகளை கல்வித் தொலைக்காட்சி வாயிலாக வழங்க அரசு திட்டமிட்டுள்ளது.
இந்தத் தேர்வுக்கான விரிவான பயிற்சித் தொகுப்புகளை மாநிலக் கல்வியியல் ஆராய்ச்சி மற்றும் பயிற்சி நிறுவனம் தற்போது தயார் செய்து வருகிறது. அனைத்துப் பாடங்களுக்குமான வினா வங்கிகள் மற்றும் பயிற்சிக் கையேடுகள் உருவாக்கும் பணி தீவிரமாக நடைபெற்று வருகிறது. இதற்காகத் தேர்ந்தெடுக்கப்பட்ட சிறந்த ஆசிரியர்களைக் கொண்டு பிரத்யேகமான பயிற்சி தொகுதிகள் வடிவமைக்கப்பட்டுள்ளன. இந்த நேரடிப் பயிற்சிகள் ஒரு மணி நேரம் வரை ஒளிபரப்பப்பட வாய்ப்புள்ளதாகத் துறை சார்ந்த வட்டாரங்கள் தெரிவிக்கின்றன.
ஆசிரியர் தேர்வு வாரியம் வெளியிட்டுள்ள அறிவிப்பின்படி, தாள்-1 மற்றும் தாள்-2 ஆகியவற்றுக்கான தேர்வுகள் முறையே ஜூலை 4 மற்றும் 5 ஆகிய தேதிகளில் நடைபெறவுள்ளன. இந்தத் தேர்வுகளுக்கு விண்ணப்பிக்க விரும்பும் ஆசிரியர்கள் வரும் ஏப்ரல் 10-ஆம் தேதிக்குள் தங்களது விண்ணப்பங்களைச் சமர்ப்பிக்க வேண்டும் என்று அறிவுறுத்தப்பட்டுள்ளனர்.
No comments:
Post a Comment