நீட் தேர்வில் விருப்பத் தேர்வு முறை அறிமுகம்

நீட் தேர்வு வினாத்தாளில் மாற்றம் செய்யப்பட்டு, விருப்பத்தேர்வு முறை அறிமுகப்படுத்தப்பட்டுள்ளது. நடப்பு ஆண்டுக்கான நீட் தேர்வு வரும் செப்டம்பர் மாதம் 12-ம் தேதி நடைபெறும் என அறிவிக்கப்பட்டுள்ளது.

நீட் தேர்வுக்கான ஆன்லைன் விண்ணப்ப பதிவு 13ம் தேதி மாலை 5 மணிக்கு தொடங்கி நடைபெற்று வரும் நிலையில், நீட் தேர்வு வினாத்தாளில் விருப்பத்தேர்வு முறை அறிமுகப்படுத்தப்பட்டுள்ளது. இதன்படி, இயற்பியல். வேதியியல், தாவரவியல், விலங்கியல் என்று 4 பாடங்களும் SECTION A, SECTION B என்று பிரிக்கப்பட்டுள்ளதாகவும், SECTION A-ல் 35 கேள்விகளும் SECTION B-ல் 15 கேள்விகளும் இடம்பெறும் என்றும் தெரிவிக்கப்பட்டுள்ளது.

மாணவர்கள், SECTION A-ல் உள்ள 35 கேள்விகளுக்கும், SECTION B-ல் உள்ள 15 கேள்விகளில் 10 கேள்விகளுக்கும் விடையளிக்க வேண்டும். அதாவது, வினாத்தாளில் உள்ள 200 கேள்விகளில் 180 கேள்விகளுக்கு விடையளிக்க வேண்டும். பள்ளிகளில் நேரடி வகுப்பு நடைபெறாததாலும், பாடத்திட்டம் குறைக்கப்பட்டதாலும் விருப்பத்தேர்வு முறை அறிமுகப்படுத்தப்பட்டுள்ளதாக தேசிய தேர்வு முகமை தெரிவித்துள்ளது.