தனியார் மருத்துவக் கல்லூரியில் MBBS, BDS படிக்க எவ்வளவு செலவாகும்? முழு கட்டண விவரம் இதோ

அனைத்து ஆசிரியப் பெருமக்களுக்கும் வணக்கம். தங்களின் படைப்புகள் மாணவர்களுக்கு பயன்படவேண்டும் என நினைத்தால், உங்கள் படைப்புகளை thamizhkadal.com@gmail.com என்ற மின்னஞ்சல் முகவரிக்கு அனுப்பிவைக்கவும் உங்கள் அனுமதியோடு வெளியிடப்படும்.

JOIN YOUR தமிழ்க்கடல் TELEGRAM GROU

SUBSCRIBE YOUR தமிழ்க்கடல் கல்வித் தொலைக்காட்சி

இந்தியாவில் மருத்துவப் படிப்புகளில் சேருவதற்கு நீட் தேர்வு கட்டாயமாக உள்ளது. இளநிலை தேர்வில் பெறும் மதிப்பெண்களின் அடிப்படையில் மருத்துவ கல்லூரிகளில் உள்ள இடங்களுக்கு சேர்க்கை நடைபெறும். அந்த வகையில், 2025-ம் ஆண்டுக்கான நீட் தேர்வு மே 4-ம் தேதி நடைபெற்று, முடிவுகள் தேசிய தேர்வு முகமையின் மூலம் வெளியிடப்படுகிறது. தமிழ்நாட்டில் உள்ள மருத்துவக் கல்லூரிகளில் சேர மாணவர்கள் ஆர்வத்துடன் உள்ளனர். தமிழ்நாட்டில் உள்ள தனியார் மருத்துவக் கல்லூரிகளில் எம்.பி.பி.எஸ் மற்றும் பி.டி.எஸ் படிக்க எவ்வளவு செலவாகும் என்ற தகவல் மாணவர்களுக்கு உதவியாக இருக்கும்.

2025-26 ஆம் ஆண்டில் தமிழ்நாட்டில் மருத்துவக் கல்லூரிகளில் சேருவதற்கான ஆன்லைன் விண்ணப்பம் தொடங்கப்பட்டு பெறப்பட்டு வருகிறது. இந்நிலையில், தமிழ்நாட்டில் உள்ள தனியார் மருத்துவக் கல்லூரிகளில் எம்.பி.பி.எஸ் மற்றும் பி.டி.எஸ் மருத்துவப் படிப்புகள் படிக்க எவ்வளவு செலவாகும் என்ற கேள்வி மாணவர்களிடம் இருக்கலாம். தனியார் கல்லூரிகளில் அரசு கோட்டா இடங்களுக்கும், மேனேஜ்மெண்ட் கோட்டா இடங்களுக்கும் கட்டணம் எவ்வளவு என்பதை அறிந்துகொள்ளலாம்.

11 ஆயிரத்திற்கு மேற்பட்ட மருத்துவ இடங்கள்

மருத்துவம் படிக்க வேண்டும் என விரும்புகிறவர்களுக்கு தமிழ்நாட்டில் 11,350 இடங்கள் உள்ளன. இதில் எம்.பி.பி.எஸ் படிக்க வேண்டும் என விரும்புகிறவர்களுக்கு மட்டும் 9,200 உள்ளன. இதில் அரசு கல்லூரிகளில் 5,200 இடங்கள் உள்ளன. தனியார் கல்லூரிகளில் 3,450 இடங்கள், தனியார் பல்கலைக்கழகங்களில் 55 இடங்கள் உள்ளன.

இதுவே பல் மருத்துவப் படிப்பான பி.டி.எஸ் படிப்பில் 1,900 இடங்கள் உள்ளன. அரசு கல்லூரிகளில் 250 இடங்களும், இதர இடங்கள் தனியார் கல்லூரிகளில் உள்ளன.

தனியார் கல்லுரிகளின் சீட் வகை என்ன?

தனியார் மருத்துவக் கல்லூரிகளில் எம்.பி.பி.எஸ் மற்றும் பி.டி.எஸ் படிப்புகளுக்கு வழங்கப்பட்டுள்ள மருத்துவ இடங்கள் இரண்டு வகையாக பிரிக்கப்படுகிறது. அதில் 50% இடங்கள் தமிழ்நாடு அரசின் கோட்டாவிலும், 50% இடங்கள் மேனேஜ்மெண்ட் கோட்டா என கல்லூரி நிர்வானத்திடமும் உள்ளன.

இப்பணியிடங்களுக்கு தமிழ்நாடு அரசின் மருத்துவக் கல்வி மற்றும் ஆராய்ச்சி இயக்குநரகத்தின் தேர்வு குழுவின் மூலம் நடத்தப்படும் கலந்தாய்வின் மூலம்தான் நிரப்பப்படுகிறது. அரசு கோட்டாவிற்கான கட்டணம் தமிழ்நாடு அரசின் மூலமும், மேனேஜ்மெண்ட் கோட்டாவிற்கு கட்டணம் நிர்ணய குழு நிர்ணயித்த கட்டணமும் வசூலிக்கப்படுகிறது.

அரசு கோட்டா இடங்களுக்கு MBBS கட்டணம் எவ்வளவு?

தனியார் மருத்துவக் கல்லூரிகளில் அரசு கோட்டாவின் கீழ் எம்பிபிஎஸ் இடங்களுக்கு ஒரு வருடத்திற்கு ரூ.4,35,000 முதல் ரூ.5,40,000 கட்டணம் நிரணயிக்கப்பட்டுள்ளது. குறைந்தபட்சம் அன்னபூர்ணா மருத்துவக் கல்லூரி, கற்பக விநாயகர், KMCH, மாதா மருத்துவக் கல்லூரி, தாகூர் மருத்துவக் கல்லூரி ஆகிய கல்லூரிகளில் குறைந்தபட்சம் ரூ.4,35,000 கட்டணமாக நிர்ணயிக்கப்பட்டுள்ளது.

ஸ்ரீ வெங்கடேஸ்வரா, சீனிவாசன், தனலட்சுமி ஸ்ரீனிவாசன், கன்னியாகுமரி மெடிக்கல் மிஷன் ஆகிய கல்லூரிகளுக்கு ரூ.5,40,000 கட்டணமாக நிர்ணயிக்கப்பட்டுள்ளது.

மேனேஜ்மெண்ட் கோட்டாவில் MBBS கட்டணம் எவ்வளவு?

தனியார் மருத்துவக் கல்லூரிகளில் மேனேஜ்மெண்ட் கோட்டாவில் எம்பிபிஎஸ் படிப்பிற்கு வருடத்திற்கு ரூ.13,50,000 கட்டணமாக நிர்ணயிக்கப்பட்டுள்ளது.

சீனிவாசன், ஸ்ரீ வெங்கடேஸ்வரா, தனலட்சுமி ஸ்ரீனிவாசன் உள்ளிட்ட கல்லூரிகளுக்கு ரூ.16,20,000 கட்டணமாக நிர்ணயிக்கப்பட்டுள்ளது.

குறைவான கட்டணம் வசூலிக்கும் ஒரே தனியார் கல்லூரி

இந்தியாவில் தலைசிறந்த மருத்துவக் கல்லுரியில் மூன்றாம் இடத்தில் உள்ள வேலூர் சிஎம்சி (கிருஸ்துவ மருத்துவ கல்லூரி) உள்ள எம்பிபிஎஸ் இடங்களுக்கு அரசு மற்றும் மேனேஜ்மெண்ட் கோட்டா இரண்டிற்கு ரூ.56,330 கட்டணமாக நிர்ணயிக்கப்பட்டுள்ளது.

பி.டி.எஸ் இடங்களுக்கு எவ்வளவு கட்டணம்?

பல் மருத்துவப் படிப்பிற்கு அரசு கோட்டாவில் தனியார் கல்லூரிகளில் உள்ள இடங்களுக்கு ரூ.2,50,000 கட்டணமாக வசூலிக்கப்படுகிறது. இதுவே மேனெஜ்மெண்ட் கோட்டாவில் ரூ.6,00,000 நிர்ணயிக்கப்பட்டுள்ளது

இக்கட்டண விவரங்கள் தமிழ்நாடு மருத்துவ கலந்தாய்வு குழு வெளியிட்ட தகவல் அறிக்கையின் அடிப்படையில் வழங்கபட்டுள்ளது. கட்டணங்களில் மாற்றங்கள் இருப்பின் கலந்தாய்வின்போது அறிவிக்கப்படும்.